4 kulla (enero) killamantami Yaku Pérezpa rikchata Facebook yallichinakun, paymi Leonidas Iza kashpapash shinallatak Jaime Vargas kashpapash Octubrepi makanakuyman kayashka kakapika, paykunapa huchami kanka nishpa. Pérez shuk tapuykutichipi FM Mundo uyachik antapimi chay hatarimanta tapukpi rimarka, shinapash mana CONAIE pushakkunata huchachirkachu, ashtawankarin Fiscaliami imatapash ninka taripaykunata rurashpa, nirka.
Shuk kulla killapimi, uyachik antamanta willachik nirka “Jaime Vargas shinallatak Iza llakikuna tiyachun maskarka”. Chaypimi Yaku Pérez kutichirka “Fiscalia imatapash ninka, shuk taripayta rurana”, shinallatak nirka “paykuna kakpika Fiscalia rikuchina kan taripaykunata rurashpa, tukuyta maskashpa. Chaypimi Juezkuna Código Órganico Penalta katinka shinallatak maykan kashpapash rikuna”.
Yakupa rikchaka Lanzados Facebook pankapimi llukchirka, chay panaka 34.847 katikkunata charin shinallatak 24 sayllapika 15.200 runakunami rikushka. Chay pankapika nikun, “tukuy llulla kan, tukuy shinapacha kan imashina kikin iñinki. Kay pankaka mana imatapash rikuyta charinchu imashina kikin yuyanki. Kikinllatak rikupaylla”. Kay pankapika wakin rikchakuna, willaykunatapash charin Guillermo Lassomanta shinallatak Lucio Gutierrezmanta, shinallatak Lenin Morenomantapash churashka.
Kay pankamantallata Youtubepipash willachikun, shinallatak RC5 shutiwan Unes tantanakuymanta rikchata churashka rikurin.
Leonidas Iza, Cotopaxi markamanta tantanakuyta pushak, shinallatak Ecuador runakunapa tantanakuymanta, Jaime Vargaspash kay 14 kapak killapi Fiscaliami kayachishka huchachishkamata, shinapash kallariy taripaypimi kan.
Comments are closed.