7 panchi killapi, Consejo Nacional Electoral (CNE) 67% chay akllaykunamanta yuparka. Chaykunata rikushpaka Andrés Arauz 32,00% yupaywan mishakurka. Katipika 20,35% Yaku Pérez, kipamanka Lasso 19,17%. Kaykunami CNE kamaywasimanta yupaykuna, shinapash 30% tukuy akllaykunamanta yupashka kan.
21:03 pachapika CNE shuk yupaykunata kurka: Andrés Arauz 31,61%, kipaka Yaku Pérez 20,61%, kimsa mikipika Guillermo Lasso 19,19%.
Kay yupaykuna kushka kipaka wakin pantay shina rikurirka, Enrique Pita shuk mushuk yupayta kurka Guillermo Lasso mana kimsa nikipi karkachu, ishkay nikipi rikurirka. Shinapash kay yupaykunaka mana tukuykunaman willachirkachu, Ecuavisa rikuchik antamanman shuk tapuykutichipi nirka.
Enrique Pita nirka conteo rápido nishka zirma hillaykuna kan, shuk yupayta llukchinkapak kan. Punta yupaykuna kushkaka 2344 akllashka pankamantalla kashka 96,7% chayka 200 pankakuna manarak yupashka kashka, nirka. 21:16 pachapika 2425 pankakunamanta ñami paktachishka.
Pita willachishka kipaka, kimsa pushak tukunkapak munakkunami rimarka chay yupaykunata rikushpa.
Andrés Arauz nirka payka shuyakrinmi tukuy yupayta charinkakaman. Shinapash nirka chay yupaykuna kushkaka ashamantalla kan. Shuyakrinmi tukuy karu mamallaktamanta yupaykunatapash charinkapak. Arauz ashtawanpash nirka chay tukuy yupaykunata charinkakamanka pakta rikuriya kakrin shinallatak paypa pankaman yaykushpa rikuchun.
Guillemo Lasso nirka 100% pankunata yupankakamanmi shuyanka shinallatak nirka imashpatak CNE chay yupaykunata kushka mana tukuy paktachikpika.
Yaku Pérezka rimarirka chay yupaykunata kushkamanta shinapash rikuriya kanka CNE yupaykunata kunkakaman, nirka. Shinallatak nirka fraude tiyankami payman, ashtawanka paymi ñawpapi kan nirka. Tukuy payman katikkunaman shuk kayachita shinarka akllaykunata rikuriya kachun.
CNE yupashpa katikun shinapash chay yupaykunaka shukman tikrayta ushanmi, ishkay nikipi kakwan, kimsa nikipi kakwan. 100% pankakunta yupashpallami yacharinka maykan ishkay nikipi sakirin kay 2021 akllaykunapi.
Exit Poll
7 panchi killapi. 17:00 pachapimi riksirirka kallariy yupaykunataka, chaykunaka Exit Poll rurashkami kan, shuk taripakkunawan.
CEDATOS 34,94% Arauz charin nirka, katipika 20,99% Lasso.
Clima Social nirka 36,2% Arauz shinallatak Lasso 21,7%
Kay yupaykunaka tapuykutichikunata rurashpami llukchishka, akllaykunaman rishka kipa runakunaman tapushka.
Defensoria del Pueblo kamaywasika exit poll nishka akllaykunaman rishkakunaman tapuy rurashkakunamanta kan, chaywanmi ñapash yacharita usharin maykan mishakukta, shinapash mana shinapacha kayta ushanchu. Chaymanta CNE yupaykunata shuyana, nirka.
Comments are closed.